“Sumqayıt”dan yeni transfer

“Sumqayıt” Basketbol Klubu heyətini gücləndirib.

Apasport.az xəbər verir ki, komanda 27 yaşlı amerikalı basketbolçu Teyvion Kirk ilə mövsümün sonuna qədər müqavilə imzalayıb.

193 sm boya malik oyunqurucu 2023/24 mövsümündə Azərbaycan çempionatında “Xırdalan”ın formasını geyinib. O, həmin mövsüm orta hesabla 23,9 xal, 7,4 ribaund və 5,4 məhsuldar ötürmə ilə yadda qalıb.

Kirk daha sonra Şimali Makedoniya çempionatında çıxış edib və orta hesabla 14,2 xal toplayıb.

Amerikalı basketbolçu müxtəlif vaxtlarda NBA G Liqasında “Portlend”, “Denver”, “Sakramento”, “Toronto” və “Finiks”in farm komandalarında da oynayıb.