Millilərimizin Avropa çempionatında rəqibləri bəlli olub

Azərbaycanın U-16 voleybol milliləri Avropa çempionatının I təsnifat mərhələsində mübarizə aparacaqlar.

Apasport.az xəbər verir ki, oğlan və qızlardan ibarət yığmalarımız noyabrın 19-dan 22-dək keçiriləcək EEVZA çempionatında iştirak edəcəklər.

Oğlanlardan ibarət komandamız Latviyanın paytaxtı Riqada B qrupunda Latviya və Finlandiya yığmaları ilə qarşılaşacaq. Qızlardan ibarət millimiz isə Estoniyanın Kaariku şəhərində B qrupunda Estoniya, Litva və Ukrayna komandaları ilə mübarizə aparacaq.

Reqlamentə əsasən, qruplarda ilk üç yeri tutan komandalar yekun sıralama uğrunda mübarizə aparacaqlar. Qrup qalibləri finalda qarşılaşacaq. Bu görüşün qalibi 2027-ci ildə keçiriləcək Avropa çempionatının final mərhələsinə vəsiqə qazanacaq.

Millilərimizin oyunlarının təqvimi:

Oğlanlar 19 noyabr 18:00. Latviya – Azərbaycan

20 noyabr 18:00. Azərbaycan – Finlandiya

Qızlar 19 noyabr 19:00. Estoniya – Azərbaycan

20 noyabr 16:00. Azərbaycan – Ukrayna

21 noyabr 19:00. Litva – Azərbaycan

Qeyd edək ki, oyunların başlama saatları yerli vaxtla göstərilib.