Azərbaycan Avropada liderlər sırasındadır – İlk iki mərhələdə 2,625 əmsal

Azərbaycan avrokubokların ilk iki təsnifat mərhələsində bonuslar nəzərə alınmadan ən çox reytinq əmsalı qazanan iki ölkədən biri olub.

Apasport.az xəbər verir ki, təmsilçilərimiz bu mərhələlərdə keçirdikləri 14 oyunda 9 qələbə qazanıb, 3 heç-heçə edib və 2 dəfə məğlub olublar.

Bu nəticələr Azərbaycanın UEFA reytinqinə 2,625 əmsal əlavə edib. Eyni göstəriciyə yalnız Latviya malikdir. Bonuslar da nəzərə alındıqda Azərbaycan və Latviya mövsüm üzrə 6-7-ci yerləri bölüşür.

İspaniya 3,750, Almaniya və İtaliya 3,428, İngiltərə isə 3,333 əmsalla daha yüksək pillələrdə qərarlaşıb. Bu ölkələr birbaşa Liqa mərhələsində çıxış edən klublarına görə bonus xalları əldə ediblər. Portuqaliyanın qazandığı 3,000 əmsalın 0,600-ü təsnifat oyunlarının, 2,400-ü isə bonusların payına düşüb.

Bonuslar nəzərə alınmadan ən çox əmsal qazanan ölkələr:

1-2. Azərbaycan – 2,625 1-2. Latviya – 2,625 3. Estoniya – 2,500 4. Finlandiya – 2,125 5. Lixtenşteyn – 2,000

Azərbaycan klublarının ölkə reytinqinə töhfəsi:

“Sabah” – 1,000 “Qarabağ” – 0,750 “Zirə” – 0,625 “Neftçi” – 0,250

Qeyd edək ki, “Sabah” UEFA Çempionlar Liqasında mübarizəni davam etdirir. “Qarabağ” UEFA Avropa Liqasından Konfrans Liqasına keçib, “Zirə” və “Neftçi” isə avrokuboklarla vidalaşıb.