İspaniya Superkuboku Türkiyədə: Oyunların təqvimi

2027-ci ildə keçiriləcək İspaniya Superkubokunun oyun təqvimi və qarşılaşmaların təşkil olunacağı stadionlar müəyyənləşib.

Apasport.az xəbər verir ki, turnir fevralın 2-dən 6-dək Türkiyənin İstanbul şəhərində təşkil olunacaq.

Yarışda “Barselona”, “Real Madrid”, “Atletiko Madrid” və “Real Sosyedad” klubları mübarizə aparacaqlar.

Fevralın 2-də keçiriləcək ilk yarımfinalda “Barselona” “Atletiko Madrid”lə qarşılaşacaq. Görüş “Fənərbaxça”nın ev oyunlarını keçirdiyi “Çobani” stadionunda baş tutacaq.

Bir gün sonra “Real Sosyedad” və “Real Madrid” “Beşiktaş”ın “Tüpraş” stadionunda üz-üzə gələcəklər.

Fevralın 6-da keçiriləcək final qarşılaşmasına isə “Qalatasaray”ın stadionu – RAMS Park ev sahibliyi edəcək.

Qeyd edək ki, turnirin bütün oyunları Bakı vaxtı ilə saat 23:00-da başlayacaq. İspaniya Superkubokunun son qalibi “Barselona”dır.

23:00. “Barselona” – “Atletiko Madrid” Stadion: “Çobani” (“Fənərbaxça”)

23:00. “Real Sosyedad” – “Real Madrid” Stadion: “Tüpraş” (“Beşiktaş”)

23:00. Yarımfinal qalibləri Stadion: RAMS Park (“Qalatasaray”)